Dansað í Bárugötunni

Föstudaginn 4. maí héldum við í Grunnskóla Vestmannaeyja upp á Alþjóða dansdaginn í annað sinn. Ákveðið var að endurtaka leikinn frá því á síðasta ári og dansa fyrir gesti og gangandi í Bárugötunni, gleðjast saman og fagna sumrinu.
Saminn var sérstakur dans fyrir daginn sem nemendur úr 4. – 7. bekk dönsuðu en nemendur úr 5 ára deild, 1., 2. og 3. bekk dönsuðu spænskan sólardans. Í lokin dönsuðu allir krakkarnir, sem voru um 400, ásamt foreldrum og gestum saman spænska dansinn.  
Mikill fjöldi fólks fylgdist með og tók þátt í fjörinu. Gleðin skein úr hverju andliti að loknum góðum degi.

Hér má sjá myndband sem Tói Vidó tók -  vídeó frá dansinum

Tónlist fyrir alla

Dagana 23. og 24. apríl voru skólatónleikar í GRV á vegum verkefnisins Tónlist fyrir alla og skólans. Í þessari skólatónleikadagskrá var leikinn tangó frá ýmsum löndum. Tilgangurinn er að kynna tangóinn fyrir nemendum bæði tónlistina og dansinn, - en tangódansinn er í sumum löndum jafn mikilvægur í samfélaginu og tónlistin sjálf. Það voru tónlistarmennirnir Matthías Stefánsson á fiðlu, Vignir Þór Stefánsson á píanó og Jón Rafnsson á bassa sem fluttu þessa dagskrá við mikinn fögnuð nemenda og starfsfólks.

Nemendur skólans voru sérstaklega prúðir og áhugasamir hlustendur og tóku vel undir í söngnum.